Од печат денеска излезе учебникот „Локална самоуправа“ од проф. д-р Гордана Силјановска-Давкова, проф. д-р Владимир Митков проф. д-р Тања Каракамишева-Јовановска, проф. д-р Александар Спасеновски и доц. д-р Марко Кртолица.
Учебникот е колективен труд на професори од пет различни генерации, пример за одлична академска соработка меѓу колешки и колеги кои активно работеле и се уште работат на катедрата по Уставно право и политички систем на Правниот факултет „Јустинијан Први“ во Скопје.
Рецензенти на учебникот се проф. д-р Билјана Ванковска од Филозофскиот факултет при УКИМ, проф. д-р Александра Максимовска-Стојкова од Правниот факултет „Јустинијан Први“ при УКИМ и проф. д-р Јетон Шасивари од Универзитетот на Југоисточна Европа од Тетово.
Изучувањето на локалната самоуправа на европско и на светско ниво се наметнува не само како научна и академска, туку и како општествена потреба. Разбирањето на локалните предизвици и граѓанските интереси се одразува и врз креирањето и водењето на националните политики. Ако државите не се посветени на локалните работи и не ги решаваат локалните проблеми, тие не можат да бидат успешни ниту во креирањето на националните политики, а уште помалку ќе бидат подготвени да ги решат проблемите на граѓаните. Ако демократијата не се практикува на локално ниво, таа не може да постои и опстои ниту на национално ниво.
Процесите на глобализацијата го намалија влијанието на граѓаните врз националните власти. Во многу држави во Европа и во светот, се засилија локалната и регионалната иновативност, територијалната и паметната поврзаност меѓу локалните заедници, во рамките на процесите на регионализација и децентрализација.
Се зголемија можностите на граѓаните да учествуваат во креирањето на локалните политики како своевидна компензација на намаленото учество на граѓаните во националните процеси на креирање политички одлуки. Порасна интересот и примената на облиците на директна демократија: граѓанската иницијатива, референдумот, петицијата, собирот на граѓани, народното/граѓанското вето, барањето за отповик на локалните претставници и слично).
Локалната самоуправа е темел на модерната демократија. Нема демократски политички систем без развиена локална самоуправа и локална демократија, оти демократијата извира од локусот во кој што граѓаните живеат, работат, комуницираат, ги задоволуваат основните лични и колективни интереси и потреби, директно или преку локалните органи, како најблиски до нив.
Овие и уште многу други важни теми поврзани со европската и македонската локална самоуправа се проучени и темелно анализирани во учебникот. Тој злезе со помош на Фондацијата „Конрад Аденауер“ од Скопје која поддржува проекти поврзани со унапредувањето на македонското високо образование.
Благодарение на големата професионалност и желбата за соработка меѓу авторите и Фондацијата „Конрад Аденауер“ студентите на Правниот факултет „Јустинијан Први“, како и студентите на другите факултети што го изучуваат предметот Локална самоуправа ќе добијат уште еден учебник целосно бесплатен.
Доколку ја превземете оваа содржина, Вие ги прифаќате Услoвите за Користење на порталот ДНЕВНИ НОВОСТИ.
