КОВИД ВЕСТИ ЕВРОПА:ЕМА ќе испита дали испитувањата на Спутник В се во согласност со стандардите

Европската агенција за лекови (ЕМА) следната недела ќе почне да истражува дали спроведените клинички испитувања на руската вакцина Спутник В против Ковид-19 се во согласност со глобалните клинички и научни упатства, информира денеска „Фајненшл тајмс“.

ЕМА ја спроведува анализата во време кога луѓето кои се запознати со процесот на одобрување на вакцините, за „Фајненшл тајмс“ изјавија дека испитувањата на Спутник В не биле спроведени во согласност со етичките стандарди.

Кирил Дмитриев, раководител на Рускиот фонд за директни инвестиции (РДИФ), за весникот изјави дека „не бил извршен притисок (врз учесниците)“ и оти испитувањата на Спутник биле спроведени „во согласност со клиничката пракса“.

Русија соопшти дека припадниците на војската и државните службеници учествувале во тестирањето на вакцината, што ја изработила државна лабораторија и ја финансирала РДИФ. јт/

Оксфорд паузира со аплицирање вакцини развиени со Астра Зенека врз деца и тинејџери

Лондон, 6 април 2021 (МИА) – Универзитетот во Оксфорд престана да им аплицира на деца и тинејџери вакцина развиена со Астра Зенека како дел од студија, во очекување на повеќе информации за случаи на згрутчување на крвта пријавени по вакцинирањето, објави Волстрит џурнал.

ЕМА истражува 44 извештаи за исклучително ретки случаи на згрутчување во мозокот, познато како тромбоза на церебрален венски синус (CVST) и се очекува да ги објави своите наоди в среда или четврток.

Претставник на ЕМА претходно изјави дека постои јасна „врска“ помеѓу вакцината на британско-шведската компанија и ЦВСТ, но дека вистинската причина се уште не е позната.

Оксфорд ќе почека за дополнителни информации од регулаторот за лекови во Велика Британија пред да продолжи да им дава вакцина на деца и тинејџери како дел од истражувањето, изјави портпаролот на универзитетот за Волстрит џурнал.

2021-04-06 21:23:51, од Златко Шумковски

Во Франција поднесена тужба поради смрт на човек по вакцинација со Астра Зенека

Париз, 6 април 2021 (МИА) – Семејство на 63-годишен маж кој почина во март во централна Франција од „тромбоза“ откако ја прими првата доза на антиковид вакцината на Астра Зенека, покрена тужба против непознато лице за убиство од небрежност.

Државниот обвинител Анција Вероник Денизо потврди дека тужбата е поднесена. Тоа не е прва тужба во Франција во врска со вакцината на британско-шведска компанија. Во Тулуз беше покрената тужба против неидентификувани лица по смртта на 38-годишна жена, а обвинителството во Нант отвори прелиминарна истрага по смртта на студент по медицина.

Париското обвинителство може да ги разгледа тие тужби како групен случај.

Регионалниот весник Дофин Либере најпрво пишуваше за тужбата за смртта на 63-годишникот. Во написот се наведува дека роднините на починатиот човек посочиле што се случило до Француската национална агенција за безбедност на лекови, која наредила дополнителни информации за да се утврдат причините за неговата смрт. зш/

2021-04-06 20:14:26, од Златко Шумковски

Данска воведе „ковид пасоши“ за внатрешна употреба

Копенхаген, 6 април 2021 (МИА) – Данска од денеска почнува со користење на „ковид пасоши“ со цел да им помогне на „несуштинските компании“ повторно да се отворат кон клиентите. Сертификатот за вакцинација е достапен преку мобилна апликација или во хартиена форма.

„Ковид пасошот“ важи за луѓето кои се целосно вакцинирани, биле позитивни на Ковид-19 пред две до 12 недели или имаат негативен ПЦР тест во претходните 72 часа.

Целта е властите постепено да почнат со отворање на економијата во земјата до крајот на мај.

Рестораните, музеите, театрите и кино салите ќе бидат отворени на 6 мај.

До 21 мај, Владата проценува дека ќе има доволно вакцинирани лица на возраст над 50 години.

– Компаниите кои ќе дозволат влез за клиенти без соодветен „ковид пасош“ ќе бидат казнети со 400 евра или 6.000 евра за повторени прекршувања, додека клиентите ќе бидат казнети со 330 евра, предупреди данското Министерство за правда.

Сепак, некои трговци се незадоволни од воведената задолжителна мерка.

Данска е меѓу првите земји во Европа која спроведува ваков систем. Сепак, „ковид пасошот“ не може да се користи за патување, иако Владата се надева на тоа.

Околу седум отсто од 5,8 милиони жители на Данска се целосно вакцинирани, а вкупно 13,3 отсто примиле барем една доза. гт/

2021-04-06 19:50:29, од Габриела Точко

Холандија: Влез во музеите и зоолошките градини само со негативен тест на Ковид-19

Хаг, 6 април 2021 (МИА) – Холандската Влада ќе почне со отворање на музеите и зоолошките градини овој месец, нудејќи им на посетителите задолжително тестирање на Ковид-19 пред да влезат, соопшти Министерството за здравство.

Тоа е прво олеснување на рестриктивните мерки од последното заклучување во земјата.

Според сегашните мерки, забранети се јавни собири на повеќе од две лица, рестораните можат да продаваат храна за носење, а навечер е во сила полициски час. гт/

2021-04-06 18:55:19, од Габриела Точко

Шкотланѓаните ќе добиваат по два теста за Ковид-19 неделно

Единбург, 6 април 2021 (МИА) – Шкотланѓаните ќе можат да добијат тестови за коронавирус двапати неделно, најави шкотската премиерка Никола Старџен, јави ДПА.

Шкотска ја воведе програмата за тестирање еден ден откако Велика Британија објави слична иницијатива, изјави Старџен на прес-конференција во Единбург.

– Ова тестирање ќе ги надополни и ќе се надоврзува на веќе тековните програми за тестирање во приоритетните области. Овој популистички пристап кон асимптоматско тестирање ќе ни овозможи да го процениме влијанието што ова би можело да го има врз натамошното сузбивање на преносот на вирусот, додаде Старџен. Ќе се користат брзи тестови, а властите ќе дадат повеќе информации за ова прашање во текот на оваа недела.

Се уште не е јасно дали тестовите ќе бидат бесплатни или луѓето ќе мораат да плаќаат за нив, јави ДПА. гт/

2021-04-06 17:54:58, од Габриела Точко

Францускиот „Стад де Франс“ е претворен во голем центар за вакцинирање против Ковид-19

Париз, 6 април 2021 (МИА) – Францускиот национален стадион е претворен во голем центар за вакцинирање против КОВИД-19, јавија француските медиуми.

Планирано е да се аплицираат 10.000 дози секоја недела на „Стад де Франс“, во северното предградие на Pариз, Сен Дени. Стадионот беше домаќин на финалето на Светскиот куп на ФИФА во 1998 година, каде Французите изјвојуваа историска прва домашна титула.

Друга „икона“ на францускиот фудбал – Стад Велодром во Марсеј (стадион на локалниот Олимпик) – веќе е „домаќин“ на сличен центар за вакцинација.

Целта е да се забрза кампањата за имунизација на земјата за да се спречи ширењето на новиот коронавирус.

Центарот во Сен Дени е снабден со дози на вакцини од американските компании Модерна и Фајзер. Тој ќе работи од 9 до 20 часот шест дена во неделата, со половина од инекциите резервирани за жителите на северното предградие на Париз.

Сиромашниот оддел, со околу 1,6 милиони жители, имаше најголема стапка на смртност за време на првиот бран на коронавирус во Франција, и сега има најмногу заразени по глава на жител. зш/

2021-04-06 16:34:36, од Златко Шумковски

Конечниот став на ЕМА за Астра Зенека се очекува в среда или в четврток

Брисел, 6 април 2021 (МИА) – Според информации објавени во неколку медиуми, Европската агенција за лекови, ЕМА, би требало да се произнесе за поврзаноста помеѓу вакцината Астра Зенека и згрутчувањето на крвта в среда или четврток.

Иако првично ЕМА не утврди поврзаност, шефот на вакцинацијата во оваа агенција во интервју во Италија денеска изјави дека сепак постои поврзаност со тромбозите забележени во бројни земји кои ја користат оваа вакцина.

Комитетот за безбедноста на агенцијата сѐ уште истражува и анализира и за сега не е постигнат конечен став, но оттаму велат дека во среда или четврток може да се очекува заклучна експертска одлука на оваа тема.

Во меѓувреме бројни земји во ЕУ ја суспендираа вакцинацијата со Астра Зенека за лица под 55-годишна возраст. тм/

2021-04-06 15:38:32, од Тања Милевска, Брисел